GUX-Aasiaat oqaluttuassartaa

 

Schultz-Lorentzenip atuarfia 1970-ikkunni sanaartorneqarpoq atoqqaarfissiorneqarlunilu augustip 15-iani 1974-imi. Tassunga pissutaavoq Aasianni meeqqat atuarfiat Gammeqarfik atuartorpassuarnik naammakkunnaarsimammat. Atuartitseriaatsinut nutaanut tulluarsarlugu Schultz-Lorentzenip atuarfia titartarneqarsimavoq.

Schultz Lorentzenip Atuarfia aallaqqaammut pilersaarutaasutut sananeqanngilaq, tassa sanaartorneq aallarnisaleruttortoq atuarfiup immikkoortortassaata aappaa unitsinneqarmat, taannalu immikkoortortaq tassaasussaagaluarpoq faginut atuartitsivissaq. Tamassumunnga pissutaatinneqarpoq Aasianni meeqqat ikiliartulersimanerat, 1950/60-ikkunni meeqqat amerliartupilooriarlutik 1970-ikkunni ikiliartulersimagamik. 1950-ikkunniit 1980-ikkut ilanngullugit atuartut kalaallit qallunaallu immikkoortinneqartarput, qallunaavaqqat Gammeqarfimmiitinneqartarput Schultz Lorentzenillu atuarfiani kalaaliaraannaallutik. Atuarfik pitsaasunik pingaartitaqartutut isigineqarpoq, 1980-ikkunnilu kalaallit ilinniartitsisunngorlaat amerlasuut atorfinitsinneqarput taamatullu danmarkimiit ilinniartitsisut inuusuttut piumassusillit suliniutissanullu takorluuilluarsinnaasut aamma atorfinitsinneqarlutik.

Avannaani Ilinniarnertuunngorniarfik GU Aasiaat 1987-imi ammarneqarpoq, Schultz-Lorentzen-ip atuarfiatut atuuffeqarallarmat isikkua taamaatsiinnarlugu. 2014-imi silataatigut iluatigullu nutarterneqarpoq. 22. februar 2016 atuarfiup nutarsarnera ilassutaalu atoqqaarfissiorneqarput.

Suliarinnittut: Geråe Joelsen, Rea Olsen, Paneeraq Thygesen aamma Aviannguaq Jørgensen, 2.o 2015/16
Paasissutissat ilaatigut atuakkamit uannga tigulaagaapput: ”Aasiaat ukiuni 250-ini”.